Oljuprísurin fellur, tí vón er um semju við Iran

Oljuprísirnir fullu munandi, eftir at amerikanski forsetin, Donald Trump, hevur sagt seg rokna við, at møguleiki er at røkka semju við Iran.

Hetta hevur havt við sær, at stúranir um eitt møguligt stríð í oljuríka økinum, eru minkaðar, skrivar AFP-tíðindastovan.

Á asiatiska marknaðinum fall prísurin 3,4 prosent, til 62,99 dollarar, meðan prísruin á Brent-olju fall 3,2 prosent, niður í 67,09 dollar.

Viðmerkingarnar hjá Donaldi Trump hava við sær vónir um, at ein loysn kann verða funnin, soleiðis at viðurskiftini kunnu gerast støðug og vandin fyri ófriði minka, skrivar AFP.

Háspenningur

Háspenningur hevur seinastu vikurnar verið millum USA og Iran, sum hvør í sínum lagi hava hótt hvørtannað.

- Ber til at fáa eina nøktandi avtalu í lag uttan kjarnorkuvápn, eigur tað at verða gjørt. Men eg veit ikki, um tað fer at henda. Men tey tosa so við okkum nú. 

Tað segði Trump, forseti, umborð á forsetaflogfarinum, Air Force One, í gjár, tá hann greiddi AP-tíðindastovuni frá teimum samráðingum, sum hann sigur eru millum partarnar í løtuni.

Í samstarvi við Ísrael leyp USA í summar á trý iransk kjarnorkuverk. Álopini skuldu sambært amerikanska forsetanum forða Iran í at ríka uran, sum kann nýtast til at framleiða kjarnorkuvápn.

Sambært Al Jazeera er ikki greitt, hvørjum standi verkini eru í, tí Iran hevur ikki loyvt altjóða kanningarfólki at kanna tey