Andrias fekk sín fyrsta sigur í Seriu A

Landsliðsspælarin Andrias Edmundsson hevur fingið sín fyrsta sigur í bestu italsku fótbóltsdeildini.

Síðan skiftið úr pólska felagnum Wisla Plock fyri kortum, hevur føroyingurin í Hellas Verona fingið ein javnleik og síðan lagt rygg til trý tap á rað.

Nú bragdaði kortini hjá botnliðnum, sum var á vitjan hjá Bologna. Heimaliðið legði seg framum beint eftir steðgin, men Martin Frese javnaði við langskotið bert fýra minuttir seinni.

Kieron Bowie gjørdist hetjan hjá Verona, tá hann avgjørdi dystin lítla løtu seinni. Andrias Edmundsson spældi allan dystin og fær góð skoðsmál aftur hesa ferð.

Nú 10 dystir eru eftir at spæla, er Verona næstaftast við 18 stigum og sjey stig eru upp til bjargingina.