Frítekst tagging:
- Tíðindi, mentan og ítróttur
Peningastovnarnir tríggjar milliardir í avlopi í fimm ár
Peningastovnarnir tríggjar milliardir í avlopi í fimm ár
Tølini staðfesta enn einaferð, at tað framhaldandi loysir seg sera væl at reka bankavirksemi í Føroyum
Avlopið hjá peningastovnunum seinastu fimm árini hevur verið meiri enn tríggjar milliardir kr.
Mynd: Bjarni Árting Rubeksen
12.03.2026 - 08:54
Eisini 2025 gjørdist eitt gylt ár hjá stóru peningastovnunum í Føroyum.
Í vikuni kom Betri Banki við einum úrsliti, sum vísir 330 milliónir í yvirskoti í fjør
Og fyri tveimum vikum síðani kom Føroya Banki við sínum úrsliti, sum vísti 356 milliónir í yvirskoti.
Samanlagt smáar 700 milliónir krónur í yvirskoti í báðum bankunum, bara í 2025. Gamaní, áðrenn skatturin er goldin, men hetta er upphæddin, bankarnir høvdu í vinningi av sínum viðskiftafólkum í fjør.
Smáu peningastovnarnir - Norðoya Sparikassi og Suðuroyar Sparikassi - hava ikki almannakunngjørt sínar ársroknskapir enn, men bara fyrra hálvár í fjør høvdu teir tilsamans 25 milliónir í yvirskoti.
Føroya Banki hevði 330 milliónir í yvirskoti í fjør. (Mynd: Bjarni Árting Rubeksen)
Loysir seg væl at reka bankavirksemi
Tølini staðfesta enn einaferð, at tað framhaldandi loysir seg sera væl at reka bankavirksemi í Føroyum.
Leggja vit samlaða yvirskotið hjá bankunum í ár - sum verður væl størri enn 700 milliónir krónur - oman á yvirskotini undanfarin ár, so sær myndin soleiðis út:
2024: 792 milliónir krónur í yvirskoti
2023: 776 milliónir krónur í yvirskoti
2022: 308 milliónir krónur í yvirskoti
2021: 498 milliónir krónur í yvirskoti
Síðstu fimm árini hava bankarnir havt 3,1 milliardir krónur í yvirskoti.
Avlopið hjá Betra Banka í fjør var 356 milliónir í fjør.
Lítið og einki tap
Í fjørsummar vísti ein greining hjá Landsbankanum, at tað er stórt sæð eingin vandi at reka bankavirksemi í Føroyum.
Tapini hjá útlánunum til vinnukundar vórðu tá gjørd upp til 0,3 prosent av samlaðu útlánunum. Tapini av útlánunum til húsarhaldini vóru enn minni - tey vóru 0,1 prosent av samlaðu útlánunum.
Stórt sæð verður tað, sum verður sett av móti tapi, seinni inntøkuført aftur.
Annar av stóru peningastovnunum - Føroya Banki, sum eisini er skrásettur á keypsskálanum - hevur alment boðað frá, at málið er, at 70 prosent av yvirskotinum skulu latast út til partaeigararnar sum vinningsbýti.
Í ár gevur tað partaeigarunum 202 milliónir krónur í vinningsbýti.
Er kopiera
Nýggjastu sendingar í ÚV
Nýggjastu sendingar í SV
