Javni letur løgtingsvalevnum sleppa framat – eisini forkvinnuni í farloyvi

Í viðtøkunum hjá Javna stendur í paragraf 3, at felagið er ein mannarættindafelagsskapur, sum er óheftur av øllum partapolitiskum virksemi.

Kortini hevur Javni lagt videokvøður frá valevnum út á sosialar miðlar, harímillum eina videokvøðu frá Helenu Jørmundsson, sum sjálv er forkvinna í nevndini í Javna, men í løtuni er farin í farloyvi.

Elisabeth Maria Rasmussen, virkandi forkvinnan sigur, at hetta ikki er ein trupulleiki, og vísir á, at allir flokkar hava fingið møguleikan at senda videokvøður, sum Javni hevur lagt út, eftir at tveir pallborðsfundir vórðu avlýstir, tí ov lítil undirtøka var fyri fundunum.

Sambært virkandi forkvinnu hava allir flokkar – uttan Sjálvstýri – tikið av møguleikanum, og hava sent eina videokvøðu, og tí er talan ikki um politiskan stuðul til einstakar flokkar.

Hon leggur afturat, at Helena Jørmundsson hevur stóran kunnleika til málsøkið og tí gevur tað meining, at hon eisini kemur til orðanna.

Kortini reisir spurningurin seg, um tað er í samsvari við viðtøkurnar Javna, tá eitt politiskt valevni fær pall á miðlum hjá einum felagsskapi, sum sigur seg vera óheftur av partapolitikki.

Hoyr tíðindainnslag her: