Lívfrøðingur: Ivasamt um djóraverndarfelagsskapur hevur lagt styggjarar út

Tað er ivasamt, um nakar djóraverndarfelagsskapur hevur lagt hvalastyggjarar út í Hvannasundi.

Tað heldur Bjarni Mikkelsen, lívfrøðingur.

Bjarni Mikkelsen

- Hetta er fyrstu ferð, at tílík tól eru funnin, men eg ivist í, at felagsskapur sum Sea Shepherd hevur lagt hetta út, sigur hann.

Í Hvannasundi hava tey funnið fleiri tól, sum senda ljóðbylgjur, og sum eru ætlað at styggja hval burtur.

- Ein bátur var í ferð við at draga gogguglúpar, tá ein endi við fleiri hvalastyggjarum hekk á einum glúpi, segði Tóri Simonsen, grindaformaður í Hvannasundi, við Dag og viku í gjár.

Tóri Simonsen

Sambært grindakunngerðini er ikki loyvt at seta upp skipanir, sum kunnu broyta atferð hjá hvali, og tí hevur Tóri Simonsen meldað málið til politiið.

Politiið váttar fyri Kringvarpinum, at málið er meldað, men politiið hevur ikki fingið fráboðanir um hvalastyggjarar aðrastaðni í Føroyum. Politiið er farið at kanna málið, og væntandi fer tað at taka einar 14 dagar at gera kanningar, sigur Jógvan Páll Joensen, varapolitiinspektørur.

Hvalastyggjari

Bjarni Mikkelsen, lívfrøðingur, roknar ikki við, at tað eru djóraverndarfelagsskapir sum Sea Shepherd, ið hava lagt hetta út, tí tey hava broytt taktikk, síðani hald var lagt á nakrar gummibátar hjá Sea Shepherd fyri 11 árum síðani. Nú filma tey í staðin. 

Hoyr innslag í útvarpstíðindunum: 

Sí eisini: Mál um grindastyggjarar meldað til løgregluna