Radio Salt: Víkingaskip skal smíðast, og Pubbin letur upp aftur

Klokkan 19 í kvøld verður aftur sent Radio Salt beinleiðis úr Mentanarhúsinum Salt. 

Sendingin er eisini ein almenn hugnaløta við tónleiki, skemti og áhugaverdum prátum, har øll í Suðuroynni eru vælkomin. Og nógv er á skránni aftur í kvøld. 

Eyðun Nolsøe, sum er heimskendur í Føroyum úr bólkinum Frændum, fer at framføra, og Annika Hvanngarð, ið er nevndarlimur í felagnum Víkingaskip, fer at greiða frá víkingaskipsætlanini á Drelnesi. Annika Hvanngarð fer eisini saman við søgufrøðinginum, Kára Jespersen, at siga frá fólkalívi, mati og enn nýttum staðarnøvnum frá víkingatíðini.

Harumframt koma umboð fyri feløgini Suðuroyar Garðafelagiði og Suðuroyar Talvfelag á gátt at greiða frá sínum virksemi.

Og so hava vit tey tíðindi, at ein kafé við meira letur upp í hølunum har Pubbin helt til í Gamla einahandlinum á Tvøroyri - í gomlu ognunum hjá Thomsen á havnarlagnum.  Hetta verður gjørt í samstarvi við kommununa og ferðavinnuna á staðnum.

Víkingaskipsætlanin er flutt úr Hovi á Drelnes - skamt frá Mentanarhúsinum Salt. Ætlanin er at byggja eitt víkingaskip á staðnum við norska Gokstadskipinum sum fyrimynd. Eisini fara neyst og skáli at verða bygd, eins og ein smiðja má útvegast. Haraftrat fara vit at tosa um víkingatíðina í breiðari merking.

Suðuroyar Garðafelag er stovnað til frama fyri urtagarðsbrúk og sjálvbjargni í oynni. Har kunnu fólk  býta um fræ, plantur og fáa íblástur. Tina Grønbech og Guðrun í Lágabø vitja sendingina.

Suðuroyar Talvfelag varð stovnað í 2021.  Í mars telvaði felagið seg upp í triðju deild, tá felagið telvaði seg fram um Havnar Telvingarfelag í seinasta umfari. Skipað felags-telving hevur ikki verið í oynni í mong ár, men áhugin sigst vera rættiliga stórur. Fríði Stenberg, formaður, Ingi Ellingsgaard og Eyðun Nolsøe greiða frá.

Kafé letur upp har Pubbin á Tvørákei var. Tað verður gjørt saman við Visit Suðuroy, sum eisini flytir oman í hølið har gamli kongaligi einahandilin var.  Hetta fer Ansgar Sørensen, fyristøðumaður, at greiða frá.

Fólk eru vælkomin á gátt á Drelnesi, men lurtast kann eisini heima.

Radio SALT byrjar sendingina í kvøld, ónskvøldið, stundisliga klokkan sjey.

Vertir eru Annika Bolton Mortensen, Jákup Magnussen og Gundur Johansen. 

Mentanarhúsið SALT og Kringvarp Føroya standa fyri framleiðsluni.