Úttøka: Fótbóltskvinnurnar spæla fyri røkkstøkk-dystum

Venjarin hjá føroyska fótbóltslandsliðnum hjá kvinnum, Pætur Smith Clementsen, kunngjørdi í dag hópin til síðsta HM-undankappingardystin í ár.

Føroyar vitja Georgia, sum tær vunnu tepurt á á heimavølli í apríl, og føroyingarnir spæla fyri sigrinum og 2. plássi í bólkinum aftanfyri Grikkaland. 

Eydnast tað, kann tað hava við sær, at Føroyar skal spæla røkkstøkk-dystir um pláss í HM-endaspælinum í Brasil næsta summar. Hetta er treyta av, at úrslitini í hinum bólkunum laga seg til fyrimuns fyri Føroyar.

 - Tað er bara tann næsti dysturin (sum vit savna okkum um, blaðm.). Tú skalt duga at vera í løtuni og njóta løtuna og ta góðu gongdina, sum er, men sjálvandi fara vit eftir tí. Vit vóna at koma víðari sum besti tvey'arin, og tað fara vit at leggja alla orku í at náa, segði Sanna Svarvadal.

Teresa Jacobsen hevur leikbann og Fridrikka Clementsen er skadd, og fyri tær hevur venjarin tikið Brá Zachariasardóttir úr HB og Helgu Mikkelsen úr NSÍ út í staðin.

 - Vit royna at hyggja at, hvussu dysturin kann útarta seg. Er tað ein dystur, sum fer at líkjast heimadystinum, har vit kunnu vera dominerandi á bóltinum, so ræður um at leggja upp á okkara spæl, so vit kunnu skapa fleiri stórar kjansir, segði Pætur Smith Clementsen.

Hinvegin verða spælararnir eisini fyrireikaðir upp á, at tað skjótt kann gerast ein dystur, har Føroyar skal verja meir enn í 1-0 sigrinum seinast.

Dysturin millum Georgia og Føroyar verður 5. juni.

Landsliðshópurin:

Málverjar
Gunnvá Lützen, HB
Óluva Allansdóttir Joensen, KÍ

Verjuspælarar
Julia Naomi Mortensen, HB
Rúna Jacobsen, HB
Birita Ryan, KÍ
Durita Hummeland, KÍ
Tórunn Højgaard Joensen, KÍ
Helga Mikkelsen, NSÍ
Mona Rasmusdóttir, Víkingur

Miðvallarspælarar
Sara Samson Shaki, HB
Súsanna Laksáfoss Godtfred, HB
Eyðvør Klakstein, KÍ
Sanna Svarvadal, KÍ
Jensa Kannuberg Tórolvsdóttir, Víkingur
Rakul Sørensen, Víkingur
Anna Caroline Brændstrup, Gil Vicente (Portugal)
Ásla Johannesen, Piteå IF (Svøríki)

Álopsspælarar
Brá Zakariasardóttir, HB
Sólja Ernstdóttir, KÍ
Heidi Sevdal, NSÍ