Torusláttur setti sín dám á Roskilde Festival

- Vit máttu øll fara upp um fimm-tíðina í morgun at spenna teltið fast og flyta lutir, sum stóðu frammi, so einki fór á flog.

Tað sigur Katrin Johannesen, tíðindakvinna og gestur á Roskilde Festivalinum.

Roskilde Festivalurin varð skotin í gongd í gjár, um somu tíð sum ógvusligt illveður hevur herjað í Danmark. 

Og tað hava festivalgestirnir á staðnum merkt.

Í gjár hoyrdist toruslátturin, men hann tóktiskt ikki at vera nær, sigur Katrin Johannesen. 

Tó var annað lív í morgun, tá gestir vaknaðu av einum ógvusligum braki og nógvum vindi.

Ógvusliga veðrið tykist tó ikki at hava elvt til, at fólk eru farin heim aftur av festivalinum.

- Her eru fólk allastaðni, so tað virkar sum, at tey flestu halda, at nú er hetta yvirstaðið. Nú eru fólk klár aftur. 

Og við 30 hitastigum er veðrið eisini blivið fragari - um tú altso dámar hita. Og eftir øllum at døma fer illveðrið ikki at halda á í sama mun, sum tað hevur víst seg seinastu dagarnar.

- Restina av tíðini fer tað at vera eitt sindur mildari. Ikki líka heitt og heldur ikki líka nógvur torusláttur, sigur Katrin Johannesen.

Hoyr innslagið niðanfyri: