Vilja hava meira tosk í Grønlandi og taka rækjuveiðuna uppaftur

Bárður á Steig Nielsen, landsstýrismaður í fiskivinnumálum, fer í heyst at royna bæði at vaksa um føroysku toskakvotuna í grønlendskum sjógvi og at útvega Føroyum rækjukvotu har aftur.

Í síðstu viku vitjaði grønlendski landsstýrismaðurin í fiskivinnumálum, Peter Borg, føroyska starvsbróður sín, Bárð á Steig Nielsen, og teir skrivaðu undir nýggjan sonevndan karmsáttmála landanna millum um fiskiskap.

Hetta var ein avgreiðsluspurningur, men tað forðaði ikki pørtunum at lodda dýpið og kanska eisini gjara eitt sindur út undan teimum regluligu, men av náttúru, altíð truplu fiskivinnusamráðingunum, sum verða millum londini í heyst. 

Føroyar og Grønland, Bárður á Steig Nielsen og Peter Borg

Ongi krøv blivu sett og ongi lyfti givin á fundinum í síðstu viku, tí spurningar um sínamillum fiskirættindi vóru sum nevnt ikki skrá tá, men Bárður á Steig Nielsen heldur, at grønlendski landsstýrismaður skilti føroysku ynskini.

Men tað er greitt, at føroyingar vilja hava meira tosk í grønlendskum sjógvi og sleppa at taka rækjuveiðuna uppaftur. Í fiskirættindasáttmálanum millum ES og Føroyar høvdu føroyingar rækjukvotu, men síðani Bretland fór úr ES, Brexit, hevur eingin rækjufiskiskapur verið hjá føroyingum í Grønlandi.

Hoyr innslag í útvarpstíðindunum: