Virðisgjald og ikki virðisgjald

Ósamsvar millum ásetingarnar í avgjaldslógini ger, at ikki er loyvt at krevja virðisgjald fyri elbilar, sum er skrásettir frá 1. apríl til 31. desember 2024.

Tað sigur Kærustovnurin, sum hevur ógildað eina avgerð hjá Akstovuni.

Akstovan kravdi virðisgjald fyri elbil, sum var skrásettur 19. desember 2024.  

Kærustovnurin sigur, at tað er torført at lesa avgjaldslógina á annan hátt, enn at lógin áleggur elbilum, sum eru skrásettir frá 1. apríl til 31. desember 2024, at rinda virðisgjald.

Samstundis undantekur lógin somu akfør frá hesi skyldu.

Reglurnar eru ógreiðar og tvítýddar.

Hildið saman við herda heimildarkravinum á skattaøkinum, metir Kærustovnurin, at heimild ikki er í avgjaldslógini at krevja virðisgjald fyri elbilar, sum eru skrásettir frá 1. apríl til og við 31. desember 2024.