Elias og Hákun kasta aftur bundesligabólt í kvøld

Elias Ellefsen á Skipagøtu og Hákun West av Teigum skulu á vøllin í kvøld, tá týska hondbóltslandskappingin byrjar aftur.

Bæði THW Kiel og Füchse Berlin leggja fyri á heimavølli ímóti sterkari mótstøðu.

Hákun West av Teigum og teir taka ímóti Melsungen í Max-Schmeling-høllini í týska høvuðsstaðnum, og Elias Ellefsen á Skipagøtu og Kiel fáa vitjan av Lemgo.

Kiel spælir klokkan 18.00 og Füchse Berlin spælir klokkan 19.00. Hannover-Burgdorf og Vilhelm Poulsen spæla sín fyrsta dyst sunnudagin, tá Rhein-Neckar Löwen vitjar.

Nýggjur kapittul í Kiel

Nýggjur kapittul byrjar í THW Kiel, har Filip Jicha ikki longur stendur á odda fyri liðnum. 

Í staðin er norski venjarin Börge Lund í heita sessinum. Julian Köster og Domen Makuc eru komnir afturat í bakketuna, og sum skilst skal norðurtýski risin spæla skjótari hondbólt.

Tað átti at hóva Eliasi Ellefsen á Skipagøtu væl. Spælskiparin stríddist við akslaskaða í fjør, men tykist vera klárur at spæla aftur nú. 

723428244_1420581950100053_2644215149276649889_n-2.jpg

Frítekst tagging: 

Ítróttur

Hondbóltur

Füchse Berlin

Champions League

Hákun West av Teigum

Bíða eftir stórspælarum í Berlin

Í Füchse Berlin skulu Hákun West av Teigum royna at kappast ímóti Magdeburg uttan millum annað Lasse Andersson, sum er farin at spæla saman við Isak Vedelsbøl í Høj í næstbestu donsku deildini.

Stórspælararnir Simon Pytlick úr Danmark og Dika Mem úr Fraklandi skifta til høvuðsstaðarfelagið næsta summar at spæla saman við Mathiasi Gidsel, og tí er eingin keyptur fyri Lasse Andersson til hetta kappingarárið. 

Frederik Simak er komin úr Lemgo og skal kappast við Matthes Langhoff um plássið á høgra bakki í ár. Um tað verður nóg mikið til at bjóða Magdeburg av, er óvist.