Royndarfiskiskapur við tvítroli eftir svartkalva og upsa

Bárður á Steig Nielsen, landsstýrismaður, hevur avgjørt at lýsa eftir umsóknum til royndarfiskiskap við tvítroli, bæði á djúpum vatni eftir svartkalva og eftir upsa. 

Kanningarleistur er gjørdur saman við Havstovuni.

Er vinnan áhugað, er ætlanin at fara undir royndirnar í heystar.

Hetta upplýsir landsstýrismaðurin í svari til Fíu Selmu Nielsen, løgtingskvinnu.

Tá kanningarnar eru lidnar, geva tær vónandi nøktandi tilfar at taka støðu til, um vit eiga at loyva tvítroli í fiskidagaskipanini, og hvussu fiskidagatalið tá skal stillast, sigur hann. 

Havast má í huga, at um tvítrol verður loyvt, kann vera neyðugt at stilla fiskidagatalið av nýggjum, so hvørt vinnan lærir seg at nýta tvítrol, sigur Bárður á Steig Nielsen.

Einki grundarlag er at meta um búskaparligu ávirkanina, um tvítrol verður loyvt.

Trolarar, sum kunnu søkja um royndarloyvi, skulu hava millum 501 og 3.000 hestar.