Útgrevsturin á Sondum á Sandi fortelur um katólsku tíðina í Føroyum

Standmyndin er úr pípuleiri og er frá 1400- ella 1500 árunum.
Fyrr í summar varð eisini ein lítil standmynd av Mariu við Jesusbarninum funnin í útgrevstrinum.

posabok_-_helgi_michelsen.png

(Mynd: Helgi Michelsen)

Lutirnir geva innlit í samtíðina og í miðaldarbønhúsið á Sondum á Sandi.
At slíkt handverk er funnið í einum føroyskum bønhúsi, vísir sambandið við evropeisku katólsku kirkjuna. Standmyndir av hesum slagnum hava verið kostnaðarmiklar, sigur Helgi Michelsen, leiðari á fornfrøðideildini á Tjóðsavninum.

Tað er tó trupult at staðfesta, hvør ápostulin er, tí onnur hondin er brotin av.
Hevði hann havt ein lykil í hondini, kundi talan verið um Pætur ápostul. Hevði hann havt ein kross, kundi talan verið um Andras ápostul. Men báðir verða ofta myndaðir sum eldri menn við skeggi.

Í hinari hondini heldur ápostulin einari posabók, einari bók innbundnari í leður. Slíkar bøkur vóru vanligar í 1400- og 1500-talinum.

Hoyr innslag her:

Verjudúkur er nú lagdur yvir útgrevstrarøkið fyri veturin, og arbeiðið verður tikið upp aftur komandi summar.

Tjóðsavnið stendur á odda fyri útgrevstrinum á Sondum í samstarvi við Moesgaard Museum og Aarhus Universitet. Fornfrøðilesandi frá Aarhus Universiteti taka lut í útgrevstrinum, sum part av útbúgvingini.