ES-uttanríkisleiðarin: Valið í Russlandi var bluff

Uttanríkispolitiski leiðarin í ES, Kaja Kallas, sigur, at tjóðartingsvalið í Russlandi var eitt fólkaræðisligt bluff. 

Hon mælir til eisini at seta revsitiltøk í verk ímóti teimum, sum hjálptu til at skipa fyri valinum í hersettu økjunum í Ukraina.

Flokkurin hjá Vladimir Putin, forseta, Sameint Russland, vann greiðan meiriluta á eini súmbolskari andstøðu, har eingin flokkur, sum bjóðar krígnum hjá Russlandi í Ukraina av, slapp at stilla upp.

- Sonevnda Dumu-valið staðfesti enn eitt stórt afturstig fyri russiska fólkaræðið. Tað var ongantíð ivi um úrslitið, skrivar Kallas á X.

- Kreml køvdi ósemjuna, bannaði einasta skrásetta flokkin, sum var ímóti krígnum í Ukraina, og útihýsti altjóða valeygleiðarar, vísir Kaja Kallas á.

Kallas skrivar á X, at hon hevur "lagt uppskot um tiltøk móti teimum, sum løgdu til rættis falska valið í hersettu ukrainsku økjunum".

ES hevur longu sett revsitiltøk í verk móti umleið 3.000 embætisfólkum og eindum í sambandi við kríggið í Ukraina, millum annað móti Putin, forseta.

Nú, ið so at siga allar atkvøður eru taldar, er Sameint Russland vinnari við 57,83 prosentum av atkvøðunum.

Tað boðar høvuðsvalnevndin frá, nú meira enn 95 prosent av atkvøðunum eru tald.

Kaja Kallas

Fær 355 sessir

Tað er framgongd samanborið við valið í 2021, tá ið flokkurin fekk 49,8 prosent av atkvøðunum. 

Sambært valnevndini, fær flokkurin 355 av 450 sessum í Dumuni.

Duman er russiska lóggávuráðið, - og duma merkir ráð á russiskum.

Putin hevur enn ikki alment viðmerkt valúrslitið. 

Undan og undir valinum segði hann greitt, at valúrslitið skal tulkast soleiðis, at hetta er ein fólkaatkvøða um kríggið, og at valið fer at vísa, at russiska fólkið fult og heilt stuðlar virðunum hjá herinum og landinum. Og at Kreml væntandi fer at tulka stóra valsigurin sum heimild og prógv fyri, at fólkið framvegis stuðlar krígnum í Ukraina.