Google fær tríggjar milliardir í bót

Leitiskipanin hjá tøknirisanum Google hevur fingið 403 milliónir evrur í bót fyri sína viðgerð av dátum um staðbinding. 

Tað svarar til tríggjar milliardir krónur í okkara peningi.

Írska dátureftirlitið hevur viðgjørt málið.

Sambært norska kringvarpinum NRK, er hetta fjórðstørsta bót fyri brot á GDPR-dátuverndarlógina higartil.

Lógin kom í gildi í mai 2018, og hon skal verja privatlívið hjá hvørjum einstøkum borgara og persónligar upplýsingar.

Sambært lógini, hevur borgarin rætt til at síggja, rætta ella strika upplýsingar, sum fyritøkur og felagsskapir hava um seg.