- Tíðindi, mentan og ítróttur
Miðskeiðisval í USA í dag

Miðskeiðisval er í USA í dag, har limir í tey bæði kømrini í kongressini, umboðsmannatingið og senatið, skulu veljast.
Valhølini í teimum 50 statunum lata ikki upp samstundis. Fyrstu valhølini lata upp fyrrapartin, føroyska tíð, og seinastu valhølini lata aftur í morgin ári.
Republikanarar hava í løtuni meiriluta í báðum kømrunum, men sambært nýggjastu veljarakanningum fara demokratarnir at fáa meiriluta í umboðsmannatinginum.
Fyri at hava meiriluta í umboðsmannatinginum, sum hevur til samans 435 sessir, skal ein flokkur hava 218 sessir.
Í løtuni væntast demokratarnir at fáa 241 sessir, vísir Real Clear Politics, sum tekur støði í øllum veljarakanningum í USA, skrivar danska TV2.
Eisini í senatinum væntast demokratarnir at fáa ein tepran meiriluta. Í senatinum eru 100 umboð, og ein triðingur av senatinum skal veljast í dag.


























