Fiskamarknaðurin sigur trimum fólkum úr starvi

Fiskamarknaðurin lagar seg til umstøðurnar og sigur trimum fólkum úr starvi, verður sagt í tíðindaskrivi.

Fiskiskapurin eftir hvítfiski er minkaður nógv seinastu árini og er nú tann lægsti í 20 ár.

Harafturat er bygnaðurin í fiskivinnuni eisini broyttur og hetta hevur ávirkað mátan feskur fiskur verður keyptur og seldur uppá.

Støðan nógv broytt

Tað eru í dag færri virkir og færri fiskibátar í drift enn fyri nøkrum árum síðani. 

Tað vil siga, at bæði talið av fiskakeyparum og fiskaseljarum er minkað.

Harafturat eru fiski- og framleiðslueindirnar blivnar størri, og í fleiri førum hoyra skip og virkir saman.

Alt hetta ger, at sølan um uppboðssøluna er minkað so nógv, at neyðugt er at gera stórar sparingar.

Hetta hevur við sær, at 3 fólk í dag eru søgd úr starvi á Fiskamarknaðinum.

Uppboðssølan heldur fram

Ætlanin er tó at uppboðssølan hjá Fiskamarknaðinum skal halda fram.

Ringt er at spáa um framtíðina, og eingin veit hvussu verður við fiskiskapinum eftir hvítfiski við Føroyar.

Fiskiskapurin hevur altíð verið svingandi, til tíðir góður og til tíðir hevur verið fiskaloysið.

Tað er eingin ivi um, at fiskiskapurin fer at taka seg upp aftur, men spurningur er bert nær.

Má brúkast meir

Viðvíkjandi framtíðini hjá uppboðssøluni er neyðugt at staðfesta, at um uppboðssøluni skal verða lív lagað, er neyðugt at fiskaseljarar standa saman og tryggja framtíðina hjá Fiskamarknaðinum og tað gerst bert við, at vinnan brúkar uppboðssøluna.

Vónað verður, at fleiri skip og bátar í framtíðini velja at selja sín fisk um uppboðssøluna, og á henda hátt tryggja rættan marknaðarprís fyri fiskin.

Somuleiðis vil hetta eisini tryggja, at fiskurin verður bjóðaður út til allar fiskakeyparar í Føroyum, skrivar stjórin, Jens Chr. Olsen í tíðindaskrivinum.