Nýggjur formaður í Reiðarafelagnum fyri farmaskip

Annfinn V. Hansen er farin frá sum formaður í Reiðarafelagnum fyri Farmaskip. Stjórin í Skansi Offshore, Jens Meinard Rasmussen er nýggjur formaður í felagnum. Formansskifti var formelt gjørt á aðalfundinum í felagnum hósdagin í farnu viku, skrivar Vinnuhúsið í tíðindabrævi. 

 

Sambært fráfarandi formanninum, so byrjar felagið at síggja vinningin av føroysku altjóða skipaskrásetinini (FAS)

- At so nógv skip nú eru skrásett í FAS-skipanini hevur sjálvsagt sína positivu ávirkan á avleidda virksemið og t.d. arbeiðspláss fyri føroyskar sjómenn. Eisini skapar henda vinna nýggj vitunararbeiðspláss á landi. Búskaparliga íkastið av avleidda virkseminum av FAS byrjar nú av álvara at síggjast aftur í føroyska samfelagnum, so sigast má, at í mun til endamálið við skipaskránni, so gongur eftir ætlan, skrivaði fráfarandi formaðurin í ársfrágreiðingini. 

Sambært tíðindabrævinum hevur felagið 25 limir, sum umboða 75 skip.