Ein tikin, ein í varðhaldi og tveir latnir leysir

Løgreglan bar skjótt at, tá hon í gjárkvøldið, kl. 23.30, fekk fráboðan um ránið uttanfyri BankNordik í Húsagøtu í Havn.

Longu hálvan tíma seinni, kl. 00.05, handtók løgreglan tveir ungar menn, og kl 14.30 ígjár varð ein 20 ára gamal maður handtikin.

Løgreglan leitaði tá framvegis eftir einum øðrum gerningsmanni.

Ein játtaði, tveir noktaðu

Teir tríggir menninir vórðu til grundlógarforoyr í kvøld.

Tveir av monnunum noktaðu seg sekar í at hava nakað við ránið at gera, men ein teirra, hin 20 ára gamli maðurin, játtaði, at hann hevði verið við til at fremja ránið móti einum starvsfólki í SMS, sum skuldi seta inn pening í samdøgurboksina í BankNordik.

Eftir hetta kravdi ákærin, at forboð varð sett fjølmiðlum at endurgeva frá tí, sum menninir søgdu undir avhoyringunum. Og dómarin játtaði hesum.

Tveir latnir leysir

Tá grundlógaravhoyringini varð liðug um 10 tíðina í kvøld, vórðu tveir teirra latnir leysir, meðan tann, sum játtaði seg sekan varð varðhaldsfonglsaður í fýra vikur.

Jens Severinsen, ákæri, kravdi 20 ára gamla mannin varðhaldsfongslaðan, so at hesin ikki hevur møguleika at ávirka vitni ella at seta seg í samband við ein gerningsmenn, sum løgreglan enn ikki hevði handtikið. 

Maðurin skal eisini persónskannast.

Fjórði maðurin handtikin

Minni enn ein tíma eftir at grundlógarforhoyrið varð liðugt, boðaði løgreglan so frá, at ein fjórði maður nú var handtikin í sambandi við málið. Hann skal grundlógaravhoyrast í morgin.

Framvegis skuldsettir

Jens Severinsen sigur, at út frá frágreiðingunum hjá teimum trimum monnunum, var tað rætt at lata tveir teirra leysar, men at skuldsetingin móti teimum báðum um, at teir onkurvegna hava havt við ránið at gera, framvegis stendur við.

Spurdur, um tað ikki er ov nógv av tí góða at varðhaldsfongsla ein mann í 4 vikur fyri nakrar fáar túsund krónur, svarar ákærin, at tað er ikki upphæddin, men handlingin móti eini kvinnu, sum er álvarslig.