Russland dubbar í Arktis

Putin hevur givið boð um at byggja nýggjar framkomnar kavbátar, og at fara undir aftur virksemi á gomlum herstøðum, sum eru niðurlagdar.
Á fundi í trygdarráðnum legði forsetin dent á, at russiskar gass- og oljuleiðingar í norðpólsøkinum skulu verjast ímóti yvirgangi og øðrum hóttanum.
- Øll trygdin skal skipast við venjingum sum verjumálaráðið skal skipa fyri, segði forsetin.
Rusland hevur økt munandi um sítt virksemi við norðpólin seinastu árini. M.a. setti ein lítil kavbátur russiska flaggið á havbotnin á norðpólinum í 2007.
Og í fjør gjørdi russiski herflotin fleiri kanningar, og segði seg millum annað at hava funnið eina nýggja oyggj við Frantz Josefs Land í íshavinum, eystanfyri Svalbard.
Umframt Danmark, so verður eisini roknað við, at bæði Kanada og Rusland fara at krevja yvirvaldsrættin yvir norðpólinum.
Tað verður havrættarnevndin hjá ST sum fær seinasta orðið í tí spurninginum.