Valið til Evropatingið byrjað

Valhølini í Bretlandi og Hollandi lótu upp í morgun. Veljast skulu 751 tingfólk, sum skulu umboða yvir 500 milliónir fólk í ES-londunum

Geert Wilders, formaður í Frælsisflokkinum, hevur - undan valinum til Evropatingið í dag - fingið øði í fólk, tí hann heldur, at Holland eigur at avmarka talið á innflytarum úr Marokko

Mynd: AP

Sigmar Bláberg

Bjarni Mohr

22.05.2014 - 13:35

Í morgin verður val í Írlandi og Kekkia, meðan veljararnir í Letlandi og á Malta fara at velja leygardagin. Sunnudagin verður val til ES-tingið í hinum 21 limalondunum, millum annað Danmark.

ES-nevndin stúrir fyri, at úrslitið av valinum í Bretlandi og í Hollandi kann ávirka valið í hinum londunum, og tí verður úrslitið ikki almannakunngjørt, fyrr enn veljararnir í øllum londunum hava valt.

Holland hevur somu valskipan sum vit, og tí skal úrslitið almannakunngerast, so skjótt sum tey 9.000 valhølini hava latið aftur í kvøld. Fleiri av stóru bløðunum fylgja valinum, og tey siga seg fara at almannakunngera úrslitið so skjótt valið er av.

Spenningur er um valið í Bretlandi og Hollandi, tí í báðum londunum eru tað ES-mótstøðuflokkar, sum hava staðið seg best í veljarakanningunum. Endaliga úrslitið av valinum verður tøkt klokkan 11 sunnukvøldið.