Skotar eru óðir um føroyskar fyrimunir

Tað heldur Ian McFadden, stjóri fyri Scottish Pelagic Processors Assocaioan, sum er í øðini inn á fríhandilsavtaluna, sum Turkaland og Føroyar hava undirskrivað. Tað er aftur ein órættvísur bági fyri Skotland á heimsmarknaðinum, heldur hann.

Kaj Leo Holm Johannesen, løgmaður, hevur sagt, at Føroyar nú kunnu kappast á jøvnum føti við onnur lond í Turkalandi. Men tað er ikki rætt, sigur Ian McFadden:

”Skotland er væl og virðiliga útihýst á turkiska marknaðinum, takka verið hasum risa skatta-av-gjaldinum á innflutningin av makreli frá ES-londum. Vit merkja somuleiðis innflutningsbannið úr Russlandi, meðan Føroyar aftur sluppu snikkaleysar,” sigur hann við Worldfishing.com.

Hann vil eisini, at ES gevur Føroyum nógv minni atgongd til makrel í ES-sjógvi næsta ár, tí Føroyar fáa ov nógv burtur úr sáttmálanum. Tað er ikki rætt, at Føroyar skulu fiska ein triðing av sínari makrelkvotu í ES-sjógvi, tað mesta við Skotland, tá Føroyar hava fingið nógv størri makrelkvotu, júst tí so nógvur makrelur er í føroyskum sjógvi. 

- Og einki av hesum fer upp á land í Skotlandi, tí tað vilja føroyingar ikki, sigur Ian McFadden.