Dýrari og ógjørligt at stýra, sleppa fólk at velja

Tað fer at kosta nógv meira enn nú, og tað verður ógjørligt at stýra útreiðslunum, um sjúk fólk sjálvi kunnu velja ella krevja at fáa serviðgerð uttanlands, eru tey ikki nøgd við viðgerðina, tey fáa í Føroyum.

So hetta er ikki ein møguleiki, Heilsumálaráðið arbeiðir við. Tað verður ógjørligt at stýra útreiðslunum til serviðgerðir uttanlands, og tað krevur eina nógv størri játtan, sigur Karsten Hansen, landsstýrismaður, sum á tingfundinum í gjár svaraði fyrispurningi frá Elsebeth Mercedis Gunnleygsdóttur um serlæknar.

Heilsunýskipan fyrst

Landsstýrismaðurin sigur, at í fjør raðfesti Heilsumálaráðið heilsunýskipanina, sum hevur til endamáls at fyribyrgja, og lógir vórðu dagførdar.

Men í vár verður av álvara farið undir at gera eina serlæknaætlan, sigur Karsten Hansen.

Hann sigur eisini í svarinum, at ikki ber til at fáa hagtøl um allar sergreinar í Føroyum. Trupulleikar eru við talgildu heilsuskipanini, THS, sum ikki fær útvegað nóg góð tøl.

Heilsumálaráðið bað um pengar til at bøta um hetta í ár, men fekk eina millión minni frá løgtinginum enn biðið varð um.

Tað verður tí eisini ein avbjóðing at fáa neyv hagtøl í ár, sigur Karsten Hansen.