Fyrsti forsætisráðharri Singapore farin til gravar

Í Singapore hava fólk í túsundatali fylgt fyrrverandi forsætisráðharranum, 91 ára gamla Lee Kuan Yew til gravar í dag. Leiðarar úr øðrum londum vóru eisini hjástaddir - teirra millum fyrrverandi amerikanski forsetin Bill Clinton.

Lee Kuan Yew var forsætisráðharri í Singapore í 31 ár, verður roknaður sum landsfaðir og framdi eina sanna búskaparkollvelting. Árini frá 1960 til 1980 fimtanfaldaðist bruttotjóðarúrtøkan, og býarstaturin gjørdist eitt framkomið vælferðar-samfelag. 

Men mannarættindi fylgdu ikki við, talu- og pressufrælsi varð skert og politiska andstøðan drigin ígjøgnum rættarskipanina.

Í samrøðu við New York Times í 2010 segði fyrrverandi forsætisráðharrin: "Eg sigi ikki, at alt var rætt, sum eg gjørdi, men tað eg gjørdi, var í góðari meining".

Hóast hann fór úr embætinum í 1990 hevði Lee Kuan Yew alla tíðina ávirkan á politisku kósina í Singapore, har sonur hansara, Lee Hsein Loong, nú er forsætisráðharri.