Danmark: Kundu spart hálva milliard í heilivági

Tað vísir ein uppgerð sum innkeypsfelagið hjá donsku sjúkrahúsunum, Amgros, hevur gjørt.

- Vit kunnu staðfesta, at nógvur heilivágur er upp í 40 prosent bíligari í Noreg enn í Danmark, og tað skilji eg ikki, sigur stjórin í Amgros, Flemming Sonne.

Amgros hevur kannað prísin á 25 teimum dýrastu sløgunum av heilivági, sum tilsamans er helvtin av útreiðslunum hjá donsku sjúkrahúsunum. Kanningin vísir, at prísurin í miðal er 17 prosent hægri í Danmark enn í Noreg. Og gongdin er á leið tann sama higartil í ár, sigur Flemming Sonne.

Í Danmark er tann avtalan galdandi, at prísurin á heilivági skal samanberast við miðalprísin í níggju londum í Norður- og vestureuropa. Noreg hevur valt at áseta prísin í miðal eftir trimum av teimum níggju londunum, har prísurin er lægstur.

- Um Danmark hevði gjørt sum Noreg, so hevði minni av peningi verið tøkur til gransking og til at menna nýggjan heilivág, og tí er norska skipanin ikki nøkur góð fyrimynd, sigur Ida Sofie Jensen í danska heilivágsstýrinum.

Ein orsøk til hækkandi prísin á heilivági í Danamrk, í mun til Noreg, er, at danska krónan er støðug, samstundis sum norska krónan er lækkað.

Útreiðslurnar hjá donsku sjúkrahúsunum til heilivág hækka skjótt. Útreiðslurnar vóru 4 milliardir kr. í 2007 og vera umleið 8 milliardir kr. í ár.