Gera tveir nýggjar goymslutunlar

Býráðið í Fuglafirði samtykti einmælt á eykabýráðsfundi fríggjadagin at geva byggiloyvi. Odd Eliasen, stjóri á Havsbrún, sigur, at boringin byrjar síðst í august.

Liðugt verður at bora við árslok, og ætlanin er at flyta í tunlarnar báðar hálvan apríl næsta ár. Byggifelagið Articon skal gera arbeiðið.

Brúka maskinur frá Viðareiðistunlinum

Maskinurnar, sum boraðu Viðareiðistunnilin, verða fluttar til Fuglafjarðar at bora har. Arbeiðið kostar góðar 30 milliónir krónur.

Býráðið í Fuglafirði hevur samtykt at keypa grótið frá Havsbrún, 119.000 rúmmetrar, fyri 13,1 millión krónur.

Rúmmeturin kostar 110 kr. Mjølgoymslan verður 4.000 fermetrar, tá tunlarnir, sum verða 250 metrar hvør, eru lidnir.