Eldru veljararnir fara at atkvøða »ja«

39 prosent av teimum, sum eru 56 ár og eldri, siga, at tey fara at atkvøða fyri, vísir ein veljarakanning, sum danska kringvarpið hevur latið gera.

Tey ungu í aldursbólkinum 18-34 ár eru ímóti. Sambært kanningini svara 38 prosent av teimum spurdu í hesum aldursbólki, at tey fara at atkvøða nei.

Bara 23 prosent fara at atkvøða fyri. Av teimum, sum eru í aldursbólkinum 35-55 ár, eru 33 prosent fyri, og 39 prosent eru ímóti.

Minnast ES sum ein felagsskap við trupulleikum

Derek Beach, lektari á stovninum fyri statskunnleika á lærda háskúlanum í Aarhus, sigur, at orsøkin til, at tey ungu ikki taka undir við at avtaka rættarfyrivarnini, er, at ES er so nógv broytt seinastu árini.

Eldra ættarliðið minnist, at limaskapurin í ES snúði seg um heimamarknað, og at alt skuldi gerast meiri smidligt.

Tey ungu harafturímóti minnast ES sum ein felagsskap við nógvum trupulleikum, eitt nú tá ið ræður um evruna og flóttafólk, sigur Derek Beach við danska kringvarpið.