Stór norðurlendsk fakfelagsráðstevna í Føroyum

Starvsmannafelagið er í næstu viku vertur fyri ráðstevnunu, har umleið  100 umboð fyri fakfeløg hjá kommunalum starvsfólkum í Norðurlondum luttaka. Heitið fyri stevnuna er spurningurin: Fakfelagsrørslan móti 2025 - aftur til limirnar?"

Á ráðstevnuni fara umboðini fyri fakfeløgini at kjakast um hvussu fakfeløgini møta framtíðar avbjóðingunum á arbeiðsmarknaðinum.

Fakfelagsrørslan í Norðurlondum stendur fyri stórum avbjóðingum. Feløgini missa limir, arbeiðsloysi hóttir, alt meðan alment virksemi alsamt verður privatiserað og útveitt. Samstundis er tað ein sannroynd, at almenna virksemid verður  meira talgilt og tað merkist á arbeiðsmarknaðinum. Roknað verður soleiðis við, at annaðhvørt arbeiðspláss í heiminum fer at verða talgilt innan 2025, skrivar Starvsmannafelagið.

Norðurlendska ráðstevnan verður sett í ovurmorgin, sunnudagin, í auditorinum í nýggja fakfelagshúsinum Smæruni hjá Starvsmannafelagnum í Havn, sum er um at verða liðugt umbygt. 

Men sjálv ráðstevnan verður hildin á Hotel Føroyum, og endar um miðdagsleitið mikudagin.