Setanin higartil kostað útivið 70.000 krónur

Bjørn Kalsø spurdi, hvussu nógv fyrsta umfar í aðalstjórasetanartilgongdini hevur kostað, býtt á uttanhýsis serfrøði, testir, arbeiðsorku hjá setanarbólkinum og annað.

Lýsingar hava kostað 9.720 krónur, serfrøði og testir hava kostað 50.000 krónur, fundarhøli til samrøður umleið 9.500 krónur. Til samans 69.220 krónur.

SÍ EISINI Óvist nær søkt verður aftur

Ein leyslig meting av arbeiðstíðini er, at persónarnir í setanarbólkinum hava brúkt millum 20 og 40 tímar hvør, sæst í svarinum.

Løgmansskrivstovan boðaði 3. juni frá, at starvið skuldi lýsast leyst av nýggjum, men enn er støða ikki tikin til um starvslýsingin skal broytast.

Umhugsað verður í løtuni, hvørt broytingar skulu gerast í setanarmannagongdunum, stendur í svarinum frá Løgmansskrivstovuni.

Marjun Hanusardóttir, løgmansstjóri, segði við útvarpið fyrr í vikuni, at enn er ógreitt, nær starvið verður lýst leyst aftur, og um tað verður lýst leyst áðrenn summafrítíðina.