Keyparar skulu vita hvat teir fáa

Tey, sum selja internet saman við fartelefonhaldi í Føroyum, eiga ikki at gera ov nógv av í lýsingum. Tað sigur Brúkaraumboðið.

Brúkaraumboðið helt tað vera neyðugt at gera eina vegleiðing um marknaðarføringina av dátupakkum og internetferð.

Minni ferð eisini upplýsast

Tað er ikki í lagi at lýsa við ógvuliga skjótari ferð ella 4G-ferð, uttan samstundis at greiða frá, hvør ferðin er.

Í lýsingum og marknaðarføring annars er loyvt at skriva "upp til" eina ávísa ferð, men kortini skal "upp til" ferðin vera tann, sum brúkarin vanliga kann vænta sær, sigur Brúkaraumboðið.

Er ferðin minni onkra staðni í landinum, skal tað eisini upplýsast. Eisini eigur televeitarin at tilskila, um ávís ferð bara er galdandi fyri ávís hald ella telefonsløg.