Innfararbann elvir til øsing

Ein skipan, sum Donald Trump ætlar at seta í gildi, ið skal forða fólki úr fleiri muslimskum londum í at koma til USA, elvir nú til øsing og ruðulleika.

Tað hendir eftir at amerikanski forsetin fríggjadagin undirskrivaði eina løgfrøðiliga fyriskipan, sum ger, at USA kann nokta muslimum innferðarloyvi.

Avgerðin um at nokta muslimum innferð í USA hevur síðstu tveir dagarnar elvt til ruðuleika og politiska øsing. Bæði í USA og ikki minst úti í heimi eisini.

SÍ EISINI Hann vil nokta muslimum innferðarloyvi

Ruðuleiki hevur um vikuskiftið valdað við landamørkini í USA. Tað hevur verið ógreitt, hvør skuldi sleppa inn í landið og hvør ikki skuldi sleppa eftir at bannið varð lýst.

Bannið hevur eisini elvt til øsing úti í heimi. Fleiri altjóða politikarar og felagsskapir hava víst sína ónøgd við avgerðina um at banna muslimum atgongd í USA.

ST hevur heitt á Donald Trump um at bjóða fólki, sum eru flýggjað undan kríggi og ræðuleikum, innivist í USA, tí skipanin er grundleggjandi fyri amerikansku búsetingarskipanina.

Politikarar úti í heimi tala at

Fleiri altjóða politikarar hava eisini víst sína ónøgd, og hava teir síðstu dagarnar talað at ætlanini hjá USA um at nokta muslimum atgongd til landið.

- Tað er ein partur av okkara ábyrgd at taka ímóti flóttafólkum, ið eru rýmd undan kríggi og ræðuleikum, sigur Jean-Marc Ayrault uttanríkisráðharri í Fraklandi.

Fleiri mótmælisgongur hava eisini verið um vikuskiftið, har uppøst fólk hava víst sína ónøgd við umstrídda bannið, sum Donald Trump hevur undirskrivað.