Vaktlæknar og skaðastovur hava úr at gera

Yvir 10.000 fólk vóru hjá vaktlæknanum, telefon 1870, í fjør.

Og til 1.september í ár eru tey yvir 7.000, sum hava verið har.

Sambært talgildu heilsuskipanini hevði læknavaktin 10.311 vitjanir í fjør og 7.377 til 1.september í ár.

Harfturat var koyrilæknavaktin heima hjá 1.636 fólkum í fjør og hjá 1.206 til 1.september í ár.

Yvir 11.000 á skaðastovu 

Tølini úr talgildu heilsuskipanini erú í svarinum hjá Sirið Stenberg, landsstýriskvinnu, til Elsebeth Mercedis Gunnleygsdóttur, løgtingskvinnu, sum spurdi um heilsuverkið. 

Nógv er eisini at gera á skaðastovunum. Í Havn vóru 7.807 fólk á skaðastovuni í fjør, í Klaksvík 2.638 og 745 í Suðuroynni.

Skaðastovan á Landssjúkrahúsinum tekur bara móti fólki, sum lækni sendir hagar. 

Sambært svarinum eru næstan 1.000 ársverk á sjúkrahúsunum í Føroyum, tey eru 972,3 í tali.