Fæst fiskiloyvi kunnu kvotur flytast til næsta ár

Treytin fyri at flyta sildakvotur og svartkjaftakvotur til næsta ár er, at løgtingið samtykkir fiskivinnunýskipanina, so hon kann koma í gildi á nýggjárinum.
Og bara tey, sum fáa fiskiloyvi eftir nýggju lógini, kunnu brúka flutta kvotu í 2018.
Høgni Hoydal, landsstýrismaður, boðaði frá í gjár, at til ber at flyta kvotu av norðhavssild og svartkjafti, sum ikki verður fiskað í ár, til næsta ár.
Upp til ein fjórðing av sildakvotuni kann flytast, og tíggju prosent av svartkjaftakvotuni.

Talan er um kvotur, sum skipini hava fingið frá landinum, og um kvotur, sum reiðaríini hava keypt á uppboði. 

Løgtingið skal tó fyrst góðkenna, at keyptar kvotur kunnu flytast millum ár.

Avreiðingargjald strikað

Landsstýrismaðurin skjýtur eisini upp, at avreiðingargjaldið, sum er tvær krónur fyri kilo, verður strikað fyri sild og makrel, sum verður landaður uttanlands. Uppskot um hetta er sent løgtinginum.

Hetta verður gjørt, tí móttøkuorkan í Føroyum er minni, nú einki virki er á Tvøroyri.

Gjaldið skal strikast tann dagin, uppskotið verður lagt fram í tinginum.

Veiðigjaldið

Veiðigjaldið fyri eginkvotur, sum verða fluttar, verður sambært lógini um veiðigjald í 2018. Tað uppskotoð verður sent til hoyringar í vikuni, sigur Høgni Hoydal.

Veiðigjald verður ikki lagt á rættindi, sum eru keypt á uppboði. 

Ikki er greitt, nær Vinnunevndin kemur við sínum áliti um uppskotið um lógina um fyrisiting av sjófeingi, sum fiskivinnunýskipanin eitur.

Vinnunevndin hevur framvegis innkallingar. Mánadagin eru umboð fyri býráðini í Klaksvík, Eysturkommuna, Fuglafirði, Runavík og á Tvøroyri biðin um at koma á fund við Vinnunevndina.