Tvær játtanir í summar skulu staðfestast við lóg

Tvey fíggjarnevndarskjøl eru við í eykafíggjarlógini, sum er komin í løgtingið.

Tey eru tilsamans 7,2 mió. kr.

Fíggjarnevndin játtaði seks milliónir krónur, so landið saman við Bakkafrosti kundi bjarga føroyska laksinum, sum annars hevði farið fyri skeytið. 

Bakkafrost átti seinastu føroysku laksarnar, sum nú eru bjargaðir í samstarvi við Fiskaaling.

Hitt fíggjarnevndarskjalið var um havnina í Skopun. 

Fíggjarnevndin játtaði í summar 1,2 mió. kr. til at rudda innsiglingina í Skopun fyri grót.

Stýriskipanin sigur, at játtanir, sum Fíggjarnevndin letur við fíggjarnevndarskjali, skulu staðfestast í løgtinginum við eykafíggjarlóg.