Semingsstovnurin einki frætt frá pørtunum

Semingsstovnurin hevur ongar ætlanir um at kalla Pedagogfelagið og arbeiðsgevararnar, t.e. Kommunala arbeiðsgevarafelagið og Lønardeildina hjá Fíggjarmálaráðnum, til fundar, nú Pedagogfelagið hevur avgjørt at herða verkfallið til eisini at fevna um allar limir, sum arbeiða hjá Almannaverkinum og á sjálvsognarstovnum hjá Almannaverkinum.

Kommunala arbeiðsgevarafelagið hevur eisini lýst verkbann fyri námsfrøðingar og hjálparfólk á kommunalu dagstovnunum og í dagrøktarskipanum klokkan sjey í morginári.

Terje Sigurðsson, semingsmaður, sigur, at Semingsstovnurin hevur onga ábending fingið um, at støðan er broytt.

- Semingsstovnurin hevur einki frætt frá pørtunum, síðani teir vrakaðu semingsuppskotið leygarkvøldið, sigur hann. 

Og Semingsstovnurin fer ikki at taka nøkur stig, fyrr enn hann hevur fingið betri grundarlag at kalla partarnar saman. 

- Partarnir vita, at teir kunnu altíð ringja til Semingsstovnin, um teir hava okkurt nýtt at leggja á borðið, sigur Terje Sigurðsson.