Familjufyrisitingin verður á Bryggjubakka í Havn

Familjufyrisitingin tekur við ólavsøkudag, tá umsitingin av familjumálum verður føroyskt málsøki, og nú er avgerð tikin um at familjufyrisitingin verður á Bryggjubakka 29 í Havn.

Ríkisumboðið umsitur málsøkið sum er, men nú biður Landsverk um tilboð upp á innbúgv til nýggju Familjufyrisitingina, sum skal verða á Bryggjubakka.

Familjufyrisitingin verður almennur stovnur, sum fer at viðgera millum annað samveru, barnapengar, hjúnaskilnað og separatión, verjumál og ættleiðing. 

Harumframt fer Familjufyrisitingin at veita barnaserkøna ráðgeving og mekling.

Freistin at lata inn tilboð upp á innbúgvið er til 17. mai kl.14.00.