Brúkaraumboðið fekk kæru um faldara til ferðafólk

Brúkaraumboðið er nú komið upp í orðaskiftið um fólk, sum ganga í haganum.

Brúkaraumboðið hevur viðgjørt eina kæru um upplýsingar í einum lýsingarfaldara til ferðafólk.

Í faldaranum verður sagt, at ferðafólk kunnu steðga, tá tey vilja, og fara í hagan, tá tey vilja.

Tann, sum kærdi, helt, at hetta kann skiljast soleiðis, at øll kunnu ganga har, tey vilja í haganum. 

Í lóg um hegn og markfred frá 1937 stendur tó, at fólk skulu biðja um loyvi, um tey fara í hagan og ikki fylgja bygdargøtunum, sigur Brúkaraumboðið.

Kann misskiljast

Lýsingastovan Sansir, sum gjørdi faldaran, viðgongur, at faldarin hjá teimum kann misskiljast.

Sansir boðaðu frá, at júst hetta brotið um at ganga í haganum verður tikið úr faldaranum ella broytt í eini nýggjari útgávu, sum kemur í september í ár.

Brúkaraumboðið heldur, at um upplýsingarnar í nýggja faldaranum verða rættaðar, so er tað nøktandi.

Brúkaraumboðið ger eisini Sansir varugar við, at um upplýst verður um at ganga í bønum og í haganum og einki verður sagt um, at til tess krevst loyvi, kann tað vera brot á marknaðarføringarlógina.

Lógin sigur, at ikki er loyvt at brúka skeivar upplýsingar ella leggja burturúr týðandi upplýsingar í markanaðarføring.