Virðini eiga ikki at flyta millum lond

Virði, sum verða skapt í Føroyum, eiga at koma føroyska samfelagnum til góðar.

Og virði, sum eru skapt í øðrum londum, eiga at koma teimum londunum til góðar. 

Hetta er kjarnin í broytingum í skattalógini og toll- og skattafyrisitingarlógini, sum skulu fyribyrgja skattahugsan í sambandi við transfer pricing.

Transfer pricing er ein stór altjóða avbjóðing, tá partafelagsskattur verður umsitin.

Transfer pricing kann gera, at feløg, sum virka í fleiri londum, kunnu flyta yvirskot til tann partin av felagnum, sum hevur heimstað í landi, har lítil og eingin partatafelagsskattur verður rindaður og flyta útreiðslurnar til landið við hægra skattinum. 

Umdømið styrkjast

Kristina Háfoss, landsstýriskvinna, legði lógaruppskotini fyri løgtingið fríggjadagin.     

Endamálið er millum annað at styrkja altjóða umdømi Føroya í skattahøpi.

Ein partur av transfer pricing reglunum, sum skulu í føroysku skattalóggávuna, er “land fyri land frágreiðingin.” 

Verkætlan hjá OECD

Land fyri land frágreiðingin er partur av BEPS, Base Erosion and Profit Shifting verkætlanini hjá OECD. 

BEPS verkætlanin er ein roynd at betra møguleikarnar hjá londunum at fyribyrgja, at stór samtøk og stór feløg, sum virka í fleiri londum, gjalda ov lágan ella als ongan skatt.

Umframt broytingar í skattalógini og toll- og skattafyrisitingarlógini verður norðurlendski dupultskattasáttmálin dagførdur, so hann er í samsvari við BEPS minstukrøvini hjá OECD. 

Føroyar hava bundið seg til at lúka BEPS minstukrøvini.