Jóan Símun Edmundsson er farin aftur til Týsklands

Tað var saknur í føroyska framherjanum, Jóan Símun Edmundsson, tá Føroyar í gjár spældu ímóti Malta.

Toftamaðurin fekk ein skaða í knæið í síðstu venjingini, sum var fríggjakvøldið.

Hann var í almennu byrjanaruppstillingini til dystin ímóti Malta, men stutt undan dystarbyrjan varð greitt, at hann kundi ikki spæla.

Skaðin er so mikið álvarsamur, at Jóan Símun Edmundsson er farin úr føroysku landsliðsleguni.

Hann er á veg til flogvøllin, har leiðin síðani gongur til Bielefeld í Týsklandi, har hann umboðar Armenia Bielefeld.

Eingin spælari verður úttikin í hansara stað, og sostatt verður tað helst antin Jákup Thomsen ella Klæmint A. Olsen, sum byrjar inni ímóti Rumenia í álopinum.

Rumenia og Føroyar spæla í Cluj týskvøldið.