Nýggjur fyribils dagstovnur í Havn

Tórshavnar Kommuna fær 56 dagstovnapláss afturat. Hetta varð samtykt á býráðsfundi í gjár. Talan er um 56 fyribils dagstovnapláss á einum fyribils stovni. Tað eru lonirnar í Hoydølum, ið skulu brúkast til endamálið.

Í løtuni eru tríggjar vøggustovur í lonunum í Hoydølum. Tær hoyra ávikavist til Býlingshúsið inni á Gøtu og í Maritugøtu, sum í løtuni verða útbygd.

Tá tað arbeiðið er gjørt, so flyta tey børnini og starvsfólkini aftur í stovnarnar, og tá skulu so 56 nýggj dagstovnapláss aftur gerast í Hoydølum á einum nýggjum fyribilsstovni, sum skal hava egið rakstrarstað.

Í fyrstu atløgu verða 36 vøggustovupláss og 20 barnagarðspláss á nýggja fyribils dagstovninum. Eftir ætlan fáa tey børnini pláss á stovninum frá 1. august í ár, boðar Tórshavnar Kommuna frá.