Royndarætlan fyri Suðuroynna farin fyri bakka

Royndarverkætlanin fyri kommunala samstarvsøkið í Suðuroynni fór fyri bakka, tá løgtingið fór í summarfrí í gjár, uttan at lógaruppskotið hjá Eyðgunn Samuelsen, landsstýriskvinnu varð komið úr aftur Trivnaðarnevndini.

Bú- og Heimatænastan er samstarvið millum tær sjey kommunurnar í Suðuroynni um eldraøkið, og endamálið við lógaruppskotinum var at beina burtur dupultfunktiónir á markamótinum millum Almannaverkið og kommunala samstarvið og at lata pening til samstarvið. 

Royndarverkætlanin varð mett at kosta hálvafjórðu millión krónur í ár og hálvafimtu millión næsta ár.

Men tað verður av ongum.

Bú- og Heimatænastan í Suðuroy hevur leingi sagt seg hava ov lítið av peningi til eldrasamstarvið og bað leingi um fund við landsstýrið um tað. Samstarvið vildi hava eina serskipan, sum hana, ið Sandoyggin hevur, men tað vildi landsstýrið ikki.

Tá hótti stýrið fyri eldraøkið við at leggja frá sær, tí tað fekk ikki økið at klára seg fíggjarliga.

Semja varð so gjørd um hesa royndarskipanina, men hon fór fyri skeyti í gjár, tá løgtingið fór í summarfrí uttan at hava samtykt verkætlanina.

Dennis Holm borgarstjóri í Vági vil ikki gera samrøðu um møguligar avleiðingar, fyrr enn tey hava viðgjørt málið.