Franskir ISIS menn dømdir til deyða

Í rættinum í Baghdad segði 32 ára gamli Fodil Tahar Aouidate, at hann varð bukaður í fongslinum til hann viðgekk, at hann hevði verið upp í yvirgangsbólkinum.

Aouidate vísti rættinum merkir á bakinum, men læknakanning varð løgd fram, ið segði, at eingi tekin vóru um, at maðurin hevði fingið ringa viðferð.

 >> SÍ EISINI Trump: Islamskur statur skjótt niðurbardur

Hann var ein av 11 fraklendingum, ið vóru givnir upp í hendurnar á myndugleikunum í Irak eftir at eitt amerikanskt stuðlað herlið í Sýria hevði verið við til at berja niður seinastu mótstøðuna hjá jihadistunum.

Frammanundan hevur dómstólurin í Baghdad dømt sjey aðrar fraklendingar og ein tunesara til deyða.

Fór til sýria í 2013

Irakisk lóg heimilar deyðarevsing fyri yvirgangsvirksemi, men í Fraklandi eru deyðadómar ikki longur partur av lógarverkinum, og Frakland hevur mótmælt, at fronsku ríkisborgararnir hava fingið slíkan dóm.

Fodil Tahar Aouidate fór fyrstu ferð til Sýria í 2013, og árið eftir fóru 22 onnur í familjuni úr Fraklandi til Sýria at gerast partur av Islamska statinum.

Heima í Fraklandi eru tvær systrar hansara dømdar fyri at fíggja yvirgang, tí tær sendu 15.000 evrur til familju í Sýria.