Reinsaríið verður spælistað

Ætlanin er, at fyrstu konsertirnar í nýggja spælistaðnum kunnu verða um miðjan februar komandi ár.

Arbeiðið at umbyggja Reinsaríið til spælistað byrjar eftir ætlan í august, sigur Tórshavnar Kommuna í tíðindaskrivi.

Húsavarðartænastan
Húsavarðartænastan átti lægsta tilboðið at gera bygningin til spælistað. Felagið bjóðar seg at gera arbeiðið fyri slakar 5 milliónir krónur uttan fyrivarni. Trý tilboð komu inn.

Tað er teknistovan Kontrast, ið hevur byggingina um hendi. Fyritøkan fer nú undir at samráðast við lægsta boðið. Síðani verður viðmæli lagt fyri býráðið at taka støðu til.

Bygt í 1830-unum
Reinsaríið varð bygt í 1830-unum. Síðani hevur pakkhús, reinsarí, vaskarí - og eina tíð eisini posthús húsast í bygninginum. Tórshavnar kommuna keypti bygningin fyri nøkrum árum síðani. Semja var um, at bygningurin skuldi varðveitast, og at hann skuldi nýtast til mentanarlig endamál.