- Tíðindi, mentan og ítróttur
Dómari: Tú ert ov vandamikil at vera úti
![](https://kvf.fo/sites/default/files/styles/grein-ovasta-mynd/public/ariel_castro.jpg?itok=nxVVwesj)
Ariel Castro er dømdur í fongsul fyri lívið í málinum, har hann var ákærdur fyri at hava hildið tríggjar kvinnur sum fangar og farið ógvuliga illa við teimum. Aftrat lívstíðardóminum hevur hann fingið 1000 ára fongsulsrevsing.
- Eg havi ongantíð dripið nakran, og eg eri ongin drápsmaður, segði Ariel Castro, tá hann fekk orðið í rættinum.
Michael Russo, dómari, svaraði Castro:
- Tú kennir teg sum eitt offur, og tað kanska tú vart sum barn, tað veit eg onki um. Men tú hevur gjørt onnur til offur. Hesar kvinnurnar skuldu havt frælsið at liva frítt. Tær skuldu ikki verið stongdar inni undir ræðuligum umstøðum, men áttu at liva lívið.
Eg eri samdur, segði Castro.
Tú gjørdi hetta ikki bara ta einu ferðina. Tú gjørdi hetta móti trimum ungum kvinnum. Vit hoyra teg siga, at tú kundi onki gera við tað. Títt vantandi innlit merkir, at tú framvegis ert ein stór hóttan fyri samfelagið. Tú hevur ikki uppiborið at vera úti í samfelagnum. Tú ert ov vandamikil, segði dómarin.
Russo segði eisini, at tað finst onki stað í heiminum, har tað er pláss fyri trælum.
- Tú kendi á tær, at tú ráddi yvir teimum, men tú tókst feil. Hesar undrunarverdu kvinnurnar hava aftur vunnið frælsið.
Nú byrjar títt helviti
Fyrr í dag tók ein av teimum trimum kvinnunum, sum vórðu hildnar fangar, orðið. Av teimum trimum, var Michelle Knights tann einasta , sum møtti í rættinum.
- Eg havi verið í helviti í ellivu ár, nú byrjar títt helviti, segði hon við pláguna og
brotsmannin, Castro.
Kelda: The New York Times, Aftenposten, ABC-news