Sildakvotan: Føroyar gjørdu vart støðuna í 2011

Tað sigur Andras Kristiansen, sum var samráðingarleiðari, í samrøðu við Sosialin.

Hann skrivaði eisini undir seinastu sildaavtaluna, sum gav Føroyum góð fimm prosent av heildarkvotuni.

Í ár hava føroyingar ásett sær sjálvum 17 prosent av heildarkvotuni, ella  góð 105.000 tons.

Gjørdu vart við støðuna
- Vit gjørdu vart við, at vit vóru ikki nøgdir við býtið. Eisini førdu vit fram, at vit vildu hava eina tilgongd at savna størri vitan um útbreiðsluna av norðhavssildini, sum skuldi brúkast sum grundarlag undir samráðingunum árið eftir, sigur Andras Kristiansen.

Hann sigur, at hetta kann skjalprógvast, tí skjøl eru í Fiskimálaráðnum.

Vann ikki frama
Men hvørki føroyska ynskið um at fáa størri part av kvotuni ella at fáa størri vitan um norðhavssildina vann frama millum hini strandarlondini, sigur Andras Kristiansen við Sosialin.

Í summar varð hann loystur frá uppgávuni at standa á odda fyri føroysku samráðingarnevndini um makrel og norðhavssild. Nýggjur samráðingarleiðari er Herluf Sigvaldsson, ráðgevi í Fiskimálaráðnum.

Andras Kristiansen stendur tó framvegis á odda fyri samráðingunum um annan uppsjóvarfisk umframt aðrar millumtjóða fiskivinnusamráðingar.