Jákup á Dul Jacobsen lænti nógv í Íslandi

Skuldin í feløgunum, sum Jákup á Dul Jacobsen átti í Íslandi var so stór, at ognararnir fáa millum lítið og einki, nú búgvið er gjørt upp. Tað skrivar íslendska Viðskiptablaðið.

Samlaða skuldin í felagnum Lagerinn var góðar 31 milliardir íslendskar krónur. Verður skuldin umroknað við kursin í februar í 2008, svarar tað til eina samlaða skuld uppá tvær til 2,5 milliardir krónur.

Í dagsins kursi svarar tað til umleið 1,4 miljardir føroyskar krónur. Skuldin var so stór, at ognararnir fáa einki.

Trotabúgvið hevði bara 140.000 kr. at býta millum kreditorarnar. Endaliga uppgerðin vísir, at ognararnir fáa 0,0095 prosent aftur. Tað svarar til, at átti tú 100 milliónir krónur tilgóðar, fært tú 9.500 krónur aftur.

Felagið kallaðist upprunaliga Lagerinn ehf, men í mai 2010 varð navnið broytt til L-Investments. Felagið keypti í 2007 meirilutan av partabrøvunum í donsku møbilketuni Ilva, og felagið átti harumframt eisini 10 prosent av ketuni Cost Plus, umframt aðrar ognir.