Ætla at vetrarfriða Fjalshaga í Vestmanna

Vestmanna bygdarráð viðgjørdi í síðstu viku eitt mál um at vetrarfriða Fjalshaga.

Umsitingin hjá kommununi hevur í eina tíð samráðst við umboð fyri Fjalshaga um at friða part av vetrarbitinum hjá haganum. Úrslitið av samráðingunum varð viðgjørt á bygdarráðsfundinum, har bygdarráðið samtykti uppskotið.

Málið er ikki endaliga samtykt av eigarunum í Fjalshaga. Hagin skal ætlandi viðgera uppskotið á hagafundi millum jól og nýggjár.
 

Eisini Neshaga

Fundur hevur eisini verið við Neshaga. Avtalað varð, at kommunan ger fullfíggjað uppskot til hagan at leggja fyri hagastevnu komandi vár. Triði hagin, sum eisini hevur rætt til vetrarbit, er Heygahagi fremra helvt.

Arbeiðið at hegna seyðin úti verður helst ikki byrjað, fyrr enn allir tríggir sáttmálar eru undirskrivaðir, stendur at lesa á heimasíðuni hjá Vestmanna kommunu.