Aftur ljóð frá horvna flogfarinum

Eitt avstralskt skip hevur aftur staðfest ljóð, sum kunnu stava frá horvna flogfarinum hjá Malaysia Airlines.

Leiðarin fyri leitingini, Angus Houston, heldur, at nú hava tey funnið økið, har flogfarið av ókendum orsøkum datt niður fyri einum mánaðum síðani.

Á tíðindafundi í Perth segði Angus Houston, at vónandi verður okkurt funnið á botni á leiðini, har leitað verður.

Leitiøkið er nú avmarkað til 75.000 ferkilometrar.

Serfrøðingar hava greinað ljóðini, sum nú eru staðfest, og teir halda, at tey stava frá svørtu kassunum í horvna flogfarinum.

Annað ljóðið hoyrdist í fimm minuttir, og hitt í sjey minuttir.

Nú eru 33 dagar farnir, síðani malaysiska flogfarið hvarv, tá tað var á veg úr Kuala Lumpur til Peking.