Ikki eta toskalivur

Ikki eta livur av toski. Tað sigur Bente Nilsen, sum er granskari við norska instituttið fyri matvørur, - stytt NIFES, í samrøðu við NRK.

Hon granskar í føðslu og matvørum, - serliga hvussu nógv umhvørvis-eitur og tungmetall eru í millum annað villum fiski.

- Í sambandi við tosk hava vit gjørt stóra kanning av fiski úr Barentshavinum, fram við strondini í Noregshavinum og úr Norðsjónum. Kanningin vísur, at nógv lívfrøðiligt umhvørviseitur kann vera í livrini, - serliga dioksin og dioksin-líknandi PCB, sigur Bente Nilsen.

Stovnurin hevur eisini kannað innihaldið í livur á toski, sum heldur til í firðum og havnum fram við norsku strondini. Út frá millum øðrum hesum kanningum mælir norska matvørueftirlitið nú fólki frá at eta livur úr fiski, sum er fiskaður fram við norsku strondini.

Eisini seiða-livur er kannað, og kanningin vísti, at hóast virðini av umhvørviseitri kunnu vera høg eisini hjá seiði, eru tey kortini lægri enn í toskalivur.

Eingi tøl eru fyri hýsulivur, men hon verður eisini kannað, skrivar NRK.

Virðini eru lutafalsliga høg fyri fiskalivur, serliga úr firðum og havnum. Í mun til markvirðið, sum er hægst loyvda virði sambært lóg um sjóføði, sæst, at miðalvirðini eru lutfalsliga nær við markvirðini í Noregshavi og Norðsjónum.

Heimsins størsti toskastovnur er í Barentshavinum, og har eru virðini fyri umhvørvis-eitur í toskalivur lægri, skrivar NRK.