Dryppar á listafólk

Tá listasølur selja listaverk fyri onnur, eiga tær at lata listafólkinum ein part av pengunum, sum fáast fyri søluna. Tað er, tá talan er um endursølu.

Tað ásetur ein nýggj kunngerð um fylgirættargjald. Kunngerðin byggir á lógina um upphavsrætt,  sum kom fyri einum ári síðani.  

Kunngerðin er galdandi fyri listaverk, sum eru gjørd í avmarkaðum tali.  

Sambært kunngerðini verður fylgirættargjald rindað við endursølu,  tá seljarin, keyparin ella millummaðurin arbeiða á listaverkamarknaðinum, eitt nú á einum uppboðsstovni, í einum listaverkahandli ella í eini listaverkasølu.

Fylgirættargjaldið, sum listafólkið, fær er í evrum í kunngerðini hjá Mentamálaráðnum. Tað kann ikki vera meira enn 12.500 evrur fyri eintakið. 12.500 evrur eru tað sama sum góðar 93.000 kr.

Gjaldið verður roknað í prosentum av tí, sum listaverkið verður endurselt fyri. Eitt verk, sum verður selt fyri til dømis 3.000 evrur, gevur 300 evrur í fylgirættargjaldi. Verður verkið selt fyri 500.000 evrur, fær listafólkið 2.500 evrur í sín part.  

Rætturin til fylgirættargjald stendur við í 70 ár frá ársskiftinum, eftir at upphavsfólkið doyði.